Waa calaamad aad u fool-xun in la yidhaahdo Maxaabiis xidhan, la booqan maayo"20100805

Waa calaamad aad u fool-xun in la yidhaahdo Maxaabiis xidhan, la booqan maayo"
Dr, Cabdi Aw Daahir


Hargaysa (Ogaal)- Dr, Cabdi Aw Daahir iyo Dr, Cabdi-qaadir Xaaji Muuse ayaa shalay la iska hortaagay inay booqdaan maxaabiista ku jirta Jeelka Mandheera, Islamarkaana laga celiyay bar Kaantarool oo laga sameeyay duleedka magaalada Sh. Abdaal.
Dr, Cabdi Aw Daahir oo xalay khadka Telefoonka ugu warmay Ogaal isaga oo Jooga magaalada Burco waxa uu sheegay in xayiraada booqashada maxaabiista ku jirta Mandheera oo ay ka mid-yihiin Hogaankii Urur siyaasadeedka Qaran loo sheegay inay amreen Wasiirka Arrimaha Gudaha iyo taliyaha ciidanka. "Waxaanu aheyn aniga iyo Dr. Cabdi qaadir, saakaanu (shalay) halkan (Burco) iska raacnay, Sh. Abdaal baanu tagnay, Abdaal baanu ka leexanay, dee markii hore waxa naloo sheegay in la tegi karo meesha, Abdaal markaanu ka leexanayna magaalada kooneheeda waxaanu ku argnay kaantarrool, 7-ba askari ayaa joogay waxay yidhaahdeen meeshan la mari kari mayo, hada waxa naga tagay bay yidhaahdeen Wasiirkii iyo Taliyii ciidamada. Markaa cid Wasiirka Arrimaha Gudaha ka soo qaadata Ruqsad (ogolaansho) mooyaane cidd kale ma geli karto."Sidaas ayuu yidhi Dr, Cabdi Aw Daahir isaga oo hadalkiisa sii watana waxa uu intaa ku daray oo uu yidhi, "Markaa, waxaanu la hadalay Taliyihii ciidanka ee joogay halkaa (Mandheera), markaa waanu isu sheegnay oo waxaanu nidhi Dhakhaatiir baanu nahay oo waxaanu doonaynaa in aanu maxaabiista soo booqano. Markaa wuxu yidhi halkan waxa yimid oo joogaTaliyii ciidamada, markaa waa naloo diiday inay ciddi timaado. Waxaanu noo sheegay inaanay suuragalayn inaanu galo meesha. Waanu ka soo noqonay oo Magaaladii Sh. Abdaal ayaanu nimid, markaa waxaan la hadlay Wasiirkii arrimaha gudaha. Waan la hadlay nin Cabdi aw Daahir la yidhaahdo ayaan ahay, oo dhakhaatiir baanu nahay oo waxaanu doonaynaa inaanu soo booqano Odayaasha xidh-xidhan. Nimankii aanu meesha ugu tagnayna waxay yidhaahdeen Wasiirka arrimaha gudaha idinka oo amar ka haysta mooyaane ma galaysaan, markaa waxaanu doonaynaa kol haday caynkaa tahay anaga oon xagna ahayn, in aanu soo booqano nimankaas. Wuxu yidhi dee anigu ma waxaan ahay ciidamada Asluubta. Waxaan idhi ninkii Taliyaha jeelka ahaa ee ciidamada Asluubta waan waydiiyay, oo waan la hadlay oo wuxuu yidhi amar baa jira Wasiirka arrimaha gadaha ah. Wuxuu yidhi, Adeer la isuma ogala'e iskaga noqo dibaanu markaa uga noqonay."
Dr, Cabdi Aw Daahir waxa uu tilmaamay in aan in dhihiisu qaban wakhtigaa cid kale oo u socotay booqashada maxaabiista. Islamarkaana laga celiyay oo loo diiday sidooda oo kale, waxana uu tilmaamay inay aad uga xumaadeen dhacdadan, "Talaababa, talaabay ka sii daraysaa, oo mar xadhigaad canaanaysaa oo aad odhanaysaa wuu qaldan yahay, marna xadhiga siyaayiinta ayaad odhanaysaa waa mid sharci-darro ah. Markaa waxa ugu daran booqasho la'aanta, oo ah xaalad dareenkeeda gaarka ah leh, oo ka duwan calaamadihii hore. Laakiin marka intaas oo ciidana la is daba dhigo ee la yidhaahdo qofna yaanu soo eegin, soona salaamin, waa dareen aad u xun." Sidaas ayuu yidhi Dr, Cabdi Aw Daahir oo ka hadlayay sida ay u arkeen talaabadan,
Waxana uu u soo jeediyay Xukuumada in sida ugu dhakhsaha badan loo sii daayo hogaanka Urur siyaasadeedka Qaran, "Xukuumada waxaanu u soo jeedinaynaa oo aanu odhanaynaa marka hore in la soo daayo Masuuliyiintaas, oo xoriyadoodii loo soo celiyo sidaanu horeba u sheegnay, oo odhan mayno kaliya dhaqankan ka daaya'e, horta marka horeba sharci-darray ku xidhan yihiine waa in la siidaayaa. Balse waa calaamad aad u fool-xun in la yidhaahdo Maxaabiis xidhan, oo maalin Jimca ah in la soo booqdo, loo yimaado oo salaama calayku la soo yidhaahdaana, in la diidaa, waa wax dhaqanka, sharciga, Asluubta iyo qaynuunka intaba ka baxsan weeye. Markaa waa inay soo daayaan, Xoriyadoodii u soo daayaan nimankaa Odayaasha ah, ee siyaasiyiinta ah, ee waxa loo haystaana ay tahay dareenkooda siyaasadeed, ee wax Dambiya oo ay galeena aanu jirin." Sidaa ayuu yidhi, įį
į