Xisbiga KULMIYE Oo Laba Jirsadey, Munaasibad Weyna Lagu Xusay
Somaliland.Org — Hargeisa, Somaliland — 24 May, 2004
--------------------------------------------------------------------------------

Xaflad ballaadhan oo lagu xusayey sannad-guuradii labaad ee ka soo wareegtey aasaaskii xisbiga mucaaridka ah ee KULMIYE oo ku beegnayd 22 May 2002 ayaa habeenkii Sabtida lagu qabtay Hotelka Ming Sing ee magaalada Hargeysa.
Xafladdaas oo si weyn loo soo qabanqaabiyey, waxaa ka soo qaybgalay masuuliyiinta Xisbiga KULMIYE, xubno ka socdey Xisbiyada UDUB iyo UCID, Komishanka Qaranka ee doorashooyinka, siyaasiyiin madax bannaan oo uu ka mid yahay Inj. Maxamed Xaashi Cilmi, wasiirkii hore ee Ganacsiga iyo Wershedaha iyo boqolaal qof oo isugu jira xubnaha iyo taageerayaasha Xisbiga KULMIYE. Waxaana halkaasi lagaga hadlay khudbado dhaadheer oo siyaasi ah, kuna wajahan xaaladda siyaasadeed ee dalka. Koox fannaaniin ah ayaa iyaguna soo bandhigay masraxiyad kooban oo loogu magac-daray "HADDII CADCEEDDAA KULULAATAY KULMIYAA KA DAMBEEYEY".
Xafladdaas oo hadallo mawaadiic kala duwan ku saabsan ay ka jeediyeen Masuuliyiin door ah oo hogaanka Xisbiga KULMIYE ka tirsan waxa kale oo hadal kooban ka jeediyey Xoghayaha Arrimaha Dibadda ee Xisbiga UCID, ahna ku-simaha Xoghayaha Guud, Cabdiraxmaan Maxamed Cabdillaahi (Cirro) oo ugu horrayn xisbiga KULMIYE ku hambalyeeyey xuska sanad-guurada labaad ee aasaaskiisa. Cabdiraxmaan Cirro waxa uu sheegay in xisbigiisu aamminsan yahay, diyaarna u yahay in asxaabtu ka wada shaqayso danta ummadda.
Masuuliyiinta xisbiga KULMIYE ee munaasibaddaas ka hadlay oo dhammaantood si kulul uga hadlay dhinacyada siyaasadda, dhaqaalaha, nabadgelyada, iwm, waxaa ka mid ahaa Marwo Siraad Cali Yuusuf, guddoomiye-kuxigeenka 2-aad ee KULMIYE ayaa iyadu hadal dheer oo ay ku furtay xafladdaas si baahsan uga warrantay siyaasadda xisbiga iyo dhalliilaha ka xukuumadda. Iyada oo ka dayrisay xaaladda dalka iyo siyaasadda Madaxweyne Rayaale ku hoggaaminayo. Marwo Siraad waxay sheegtay in Xisbiga UDUB uu sii baaba'ayo, waxayna ku boorrisey in Xisbigu dib u soo kabto oo uu kaalintiisa buuxiyo.
.Muj. Cali Maxamed Yuusuf (Cali Gurey) ayaa isaguna si cilmiyaysan u naqdiyey miisaaniyadda muranka badani ka dhashay ee dowladda 2004.
Xafladdaas waxa kale oo ka soo qaybgalay Muj. Muuse Biixi Cabdi iyo Dr. Cabdi Aw Daahir oo ka soo hoydey socdaal ay muddo ka badan Afar Bilood ugu maqnaayeen dalka Ingiriiska. Waxaana warbixin ku saabsan socdaalkooda ka jeediyey xafladdaas Dr. Cabdi Aw Daahir. Isaga oo ka warramay dareenka dadka dibadda jooga ee u dhashay Somaliland iyo dedaalka ay ugu jiraan inay dalkooda wax u qabtaan.
Dr. Cabdi Aw Daahir waxa uu sheegay in dadka dibadda jooga in badidoodu ay taageersan yihiin Xisbiga KULMIYE. Waxana uu dadka u gudbiyey farriimo badan oo uu sheegay in dadka dibaddu ay soo fareen, kuwaas oo ay ugu muhiimsanaayeen in dadka gudaha joogaa ay wax qabtaan, iyaguna ay kaalmaynayaan.
Cabdirisaaq M. Dubbad, Hargeysa.